Mrembo wa Tanzania mwaka 2000, Jacqueline Ntuyabaliwe Mengi, amemuandikia barua ya wazi Rais wa Jamhuri ya Muungano wa Tanzania, Dkt. Samia Suluhu Hassan, akieleza changamoto zinazowakabili watoto wanaopoteza wazazi, hususan baba, na kuomba hatua madhubuti zichukuliwe kulinda haki zao.

Katika barua hiyo, Jacqueline anasema mara nyingi haki za watoto za kupata malezi na urithi hazitekelezwi ipasavyo, jambo linalowaacha mama wachanga waliopoteza wenzi wao wakikabiliana na mateso mapya kutokana na mianya katika mifumo ya usimamizi wa mali.

Amebainisha kuwa hali hii huathiri zaidi watoto wanaompoteza baba, kwani hukosa ulinzi na usalama wakati wanapohitaji uthabiti wa kifamilia. Jacqueline ameomba Rais Samia kuhakikisha kuwa:

Wasimamizi wa mali za marehemu wanawajibishwa kwa uadilifu, huku kukiwepo na ukaguzi madhubuti dhidi ya matumizi mabaya ya mamlaka.

Mama vijana pamoja na watoto wao waliobaki bila kinga wapate ulinzi maalumu ili wasiachwe bila msaada kutokana na udhaifu wa mifumo.

Akiweka msisitizo, Jacqueline amewataka viongozi wa taifa kusimama mstari wa mbele kulinda haki za watoto, ili kuepusha hali ya mtoto kupoteza mara mbili—mzazi na haki yake ya maisha bora ya baadaye.

Akiwa anahitimisha ujumbe wake, amemwambia Rais Samia:

“Uongozi wako tayari umefungua njia ya uwezekano. Ukiweka haki za watoto katikati ya maono yako, utabadilisha maisha ya familia nyingi na kuhakikisha kuwa hakuna mtoto anayepitia dhuluma mara mbili—maumivu ya kupoteza mzazi na kunyimwa haki ya baadaye. Naomba urithi wako uendelee kung’aa kama taa ya huruma, ujasiri, na mabadiliko, ukithibitisha kuwa katika taifa letu, walio hatarini kamwe hawatasahaulika.”