Waziri Mkuu wa Israel Benjamin Netanyahu atahutubia wabunge wa Marekani mjini Washington DC tarehe 24 Julai, viongozi wa bunge walitangaza Alhamisi.
Atazungumza na mabaraza yote mawili ya Congress - Seneti na Baraza la Wawakilishi - wakati vita vya Israel na Gaza vikiendelea.
Republican na Democrats wote walimwalika waziri mkuu kuzungumza, lakini tarehe ya hotuba yake haikuwekwa rasmi hadi Alhamisi.
Mwezi uliopita mwendesha mashtaka wa Mahakama ya Kimataifa ya Jinai aliomba hati ya kukamatwa kwa kiongozi huyo wa Israel na waziri wake wa ulinzi, Yoav Galant, kwa tuhuma zinazohusiana na vita.
Bw Netanyahu alilaani hatua ya ICC, akisema alikataa kwa kuchukizwa na kwamba "Israel ya kidemokrasia" imelinganishwa na kile alichokiita "wauaji wa halaiki".
Bw Netanyahu alisema, kulingana na taarifa iliyotolewa na viongozi wa bunge, kwamba "ameguswa sana kupata fursa ya kuiwakilisha Israel... kuwasilisha ukweli kuhusu vita vyetu vya haki dhidi ya wale wanaotaka kutuangamiza".
Katika barua yao ya kumwalika waziri mkuu, Spika wa Bunge Mike Johnson na Kiongozi wa Wachache katika Seneti Mitch McConnell - wote wakiwa Warepublican - walisema wanatumai Bw Netanyahu angechukua fursa hiyo "kushirikisha maono ya serikali ya Israel ya kutetea demokrasia, kupambana na ugaidi, na kuanzisha haki na amani ya kudumu katika eneo hilo".
Ziara ya Bw Netanyahu inajiri huku uhusiano wake na Marekani ukizidi kuwa wa wasiwasi, hasa miongoni mwa viongozi wakuu wa chama cha Democrats nchini Marekani.
