Apple inaripotiwa kuwa itaendelea kuzuia TikTok kupatikana kwenye Duka lao la Programu (Appstore) soko la Marekani hadi jukwaa hilo linunuliwe na kampuni ya Marekani.
Hili linatokana na marufuku ya serikali dhidi ya programu zinazomilikiwa na ByteDance, ikiwemo TikTok. Ingawa Rais Trump aliahirisha kwa muda utekelezaji wa marufuku hiyo kupitia agizo la kiutendaji, ByteDance bado haijapata mnunuzi wa Marekani.
Watumiaji waliofuta tiktok baada ya kufungiwa hawawezi kuipata tena, waliobaki nayo hawawezi kui-update na simu mpya haziwezi kuwa na uwezo wa kufikia App hiyo mpaka inunuliwe na kampuni ya Marekani.
Baada ya TikTok kutolewa kwenye App Store ya Apple na Google Play kufuatia marufuku ya ndani ya Marekani, watumiaji waliodhani app hiyo haitarudi walijikuta hawana uwezo wa kuipakua tena baada ya kuifuta. Hali hii imeongeza mahitaji ya simu zenye TikTok tayari imefungwa, na matangazo ya bei ya juu yameonekana kwenye majukwaa kama eBay.
Baadhi ya simu za iPhone zenye TikTok zimekuwa zikiuzwa kwa mamilioni ya pesa. Kwa mfano, iPhone 16 Pro Max inauzwa kwa shilingi milioni 126, huku simu nyingine mjini Raleigh, North Carolina, ikiorodheshwa kwa zaidi ya shilingi bilioni 2.3. Wauzaji kwenye mitandao ya kijamii pia wanatangaza simu zenye TikTok, na mtumiaji mmoja akitoa ofa ya milioni 12 kwa simu yenye app hiyo.
Watumiaji waliokuwa na app hiyo mwanzo sasa wanatafuta mbinu mbadala mitandaoni, wengi wakitoa pesa nyingi kwa simu zenye TikTok tayari. Mmoja aliandika kwenye X (zamani Twitter) na Reddit akisema, "Nilifuta TikTok siku ya marufuku, nikidhani haitapatikana tena, kumbe ingekuwa bado inafanya kazi kwa watumiaji waliokuwa nayo."
Apple imeeleza wazi kuwa itatii sheria inayopiga marufuku TikTok na app nyingine za ByteDance kama CapCut na Lemon8, licha ya Rais Donald Trump kuongeza muda kwa ByteDance kupata mnunuzi wa Marekani. Sheria hiyo inakataza usambazaji, matengenezo, au huduma za app zinazodhibitiwa na wapinzani wa kigeni, ikimaanisha TikTok haitapatikana kwa kwa muda usiojulikana, mpaka inunuliwe na kampuni ya Marekani.
